 |
 |
 |
| Geschrieben von: claudi |
| Mittwoch, 28. Januar 2009 um 17:14 |
|
Dr Imzug von Walter Reinhold + Wenn's ne Iesel ze gut gieht, gieht'r af's Eis tanzn. In doroane den Fall woarsch esue. Untn in dr Greizer Gegnd haaßt e Ort Hermannsgrün und do is im 1900 rim aah e schess Bauerschzeig geween. Die Gegnd do untn is fruchtboar, es gibt net sue viel Staa din Land und es Klima is net esue rauh, wie be uns. De Bauerschfraa hett e schiene Örbschaft gemacht, wall ihr Voater gestorbn woar. Es hett siech rimgeredt, aß do uebn be Werda e Talspörr gebaut wern sell fer de Wasserversorging dr Stadt Plaue. Es tettn Arbeter gesucht wern und aah Pferfuhrwerker zen Transportiern vun Baumaterial zu dere grueßn Baustell.  Der Bauer do untn in Hermannsgrie hett nuch drzu drfoahrn, aß in Wer aah e Bauerschzeig ze verkaafn is, des tett goar net viel kostn, wall's eweng verliedert is. Es wär es größte vun Dorf und zegoar Wald tett drzugeheärn. Der Bauer mit den Fuhrwerk hot mit'n Vurnoame Franz gehaaßn. „Hulda", maant'r ze seiner Fraa, „iech guck mier do uebn des Bauerschzeig mol oa." De Hulda woar drgegn und sogt: „Mier sei doch doroane aufgewachsn und unner Bauerschzeig is in Schuß, Geldsorgn ham mr aah net." Ober dr Franz hot siech trotzdem nei'n Zug gesetzt und de Raas af Wer oagetretn. Sue is'r mit den Besitzern vun den Bauerschzeig gleich aanig wurn und hot sei Fraa vur e vollend'te Tatsach gestellt. En Kaafer fer sei Bauerschzeig drham hett'r hortig gefunne, wall's ebn in Schuß woar. Ne Hörbest 1899 goang dr Imzug lues. Sei Vieh und de Ernt hot'r alles mietgenumme, wall in Wer nix din Stall woar und net viel din dr Schei. Im erschtn Goahr hot'r siech e poar Pfer gekaaft. Es ging ja aah langsam lues mit'n Talspörrnbau und derwegn wott'r ebn hortig af Wer. Im Goahr 1903 woarsch sueweit und dr Bau goang lues. Dr Franz hot siech aah en Knecht eigestellt. Selber hett'r fünf Kinner, zwee Gunge und drei Maadle. Über'n Knecht hot'r siech e weng geörgert, der hot sue viel Butter gessn. „Du isst ze viel Butter!", hot'r ze ihn gemaant, „Quark mußte essn, Quark macht stark!" „Ach", hot dr Knecht gesogt, „dei weng Zeig doroane iss iech aah mit dr Butter!" Seine Gunge warn ze eren Eisatz aah sueweit. Drei Pfergespanner sei nu ben Talspörrnbau eigesetzt wurn. Des woar e ganz halwegs Geschäft. Dr Franz is ober aah gern mol eigekehrt, im e poar Bier ze trinkn. Jedn Tog warn ben Bauersch Hermann din dr „Sunn" seine Pfer gestandn. Nooch Feierumd, wenn's ne Pferne ze lang gedauert hot, sei se allaa ham gemacht, oder sei Fraa, de Hulda, hot se gehult. Dr Talspörrnbau goang von 1903 - 1909. Drnooch warn nuch e weng Aufraamarbeten ze toa mit'n Pferne, ober nooch woar Schluß. Seine Kinner warn drwalle sueweit mit'n Heiratn. De grueß vun de Maadle hot en grußen Bauer vun Neidorf geheirat, es annere Maadl en Bauer vun Bargn, des woar standesgemäß, ober mit de Gunge, do warn se mit denen ihrn Freiern net ganz eiverstandn. Die hettn siech zwee Schwestern vun Neidorf oagelacht, die hettn halt net soot. Derwegn hot'r siech mit san Gungen verkracht. Do sei die mol be Nacht e Nebel vun drham fort. Sue woar'r mit seiner Fraa und ne Knecht ganz allaa. Es gunge Maadel woar in Stellung, also woar die aah nimmer drham. Itze is 1914 dr erschte Weltkrieg ausgebrochn. Af seine Gunge hett'r suewiesue net rechne känne, die mußtn zen Miletär. Dr grueß Gung hett drwalle geheirat, dr annere is mit san Maadl net aanig wurn. Der hot se mit eren Kind sitzn loon. Dr Krieg woar ze End und es koam de Inflation. Do hot dr Franz gedacht, verkaafst dei Bauerschzeig. En Haufn Geld hot'r aah drfier krigt. Sue is'r mit seiner Hulda af Plaue gezuegn zen güngstn Maadel, die dotte e Woahning hett. Dr grueße Gung hett mit seiner Fraa Pech, se is an dr Lungekranket gestorbn. Er hot wieder geheirat und die Fraa hett e klaans Haisel mit e weng Grund e Buedn. Des hot ne scho gepasst, kunnt'r doch e weng Landwirtschaft betreibn. Er woar eigntlich mit Leib e Siel Bauer. Es Stickn hett'r ober aah gelernt. Des woar itze sei Arbet, ober nebnbei wott'r de Landwirtschaft aah net loon, denn'r hett ja 2 ha Feld und Wies zen Haisel gepacht. Dr Paul, sue woar dr Noame vun san Gung, is scho wieder gut wurn mit san Voater. Gern sei dr Franz und de Hulda ze ihrn Gung und seiner Familie ze Besuch gange. Dr annere Gung, Ernst woar sei Noame, hett af Hermsgrie be Dreihief geheirat. Aah do wott dr Franz wieder gut wern, ober der hot ogeleäht und wott nix mehr mit san Voater ze toa hom. Sue sei se mitenanner 1929 + 1930 in Plaue gestorbn, dr Franz und sei Hulda. Wenn se immer ne Paul besucht ham, hett dr Franz e grueße Reisetasch miet. Nooch san Tued ham se die Reisetasch gefunne, die woar vollgestopft mit Inflationsgeld. Es warn Billione und Drillione und annere Schei mit wer waß wie viel Nulln. Des Geld wenn heit nuch geltn teet, kännt mr ne Bundeshaushalt urndlich saniern. |