 |
 |
 |
| Geschrieben von: claudi |
| Donnerstag, 22. Januar 2009 um 10:54 |
|
E Wannertog von Walter Reinhold + "Eh de grueßn Ferien luesgenne, machen mr gleich morgn nuch en Wannertog", hot uns dr Lehrer din dr Schul gesogt. Mier ham uns nadierlich gefraat und alle Hurra! geschriern. "Also", hot dr Lehrer gemaant, "tutt eich nei'n Rucksack e wos ze Essen und ze Trinken, es is e ganz schiene Streck, die wos mr laafn wölln." Es sott no ne Bargner Boahhuef giehe, ne Boahglaas entlang af Lottngrie und ieber Kottngrie wieder ham af Wer. Frieh im sieme woar an dr Poppengrüner Schul Abmarsch. Ben Wörtshaus goang's den Weg no ne Angerteich und ben Wald wieder nebn nei. Mr laaft goar net lang, do sieht mr dorch de Fichtn lang es Wasser vun dr Geignbachtalspörr. Unner Lehrer hot uns drklärt, wegnwos die Talspörr gebaut wurn is und aß des vurdem e arg schäss Tol woar. Do hintn stand de Geignmühl und nuch e poar Haiser. "Do des is dr Hungerfelsn, der as'n Wasser eweng rausguckt und uebn do is dr Wachbarg, wu's e Soog drieber gibt, aber des drziehl iech eich e annersch Mol." Sue warn mr aah lang an dr Spörrmauer und es ging watter dorch ne Wald. Af dr rechtn Seit woar e Staabruch. Do klärt uns dr Lehrer auf, aß do de Staa for de Talspörr gebrochen wurn sei. Es musst jeder Staa ganz raa sei, eh'r vermauert wern kunnt. Sue goang's immer ne Weg watter bis mr untn an dr Stroß rauskumme sei, die vun Bargn af Wer gieht. Die gieht ben Bargner Boahhuef links nei ne Wald. Bis vorne hie, wu's nauf'm Fuchsloch gieht, sei mr de Boahglaaser entlang gange. Dr Lehrer sogt: "Kinner, geht af de Seit, itze kimmt e Zug". Dr Lokführer hot uns gesehe und e poarmol gepfiffn und uns zugewunkn. Des woar schie. Die Streck gieht vun Falkenstaa af Plaue zen untern Boahhuef. Schu vun weitn ham mr gesehe, aß mr ball noa e Boahwärterhaisl kumme. Wu mr nakumme sei, goang dotte dr Weg uebn vun dr Oelsnitzer Stroß nooch Bargn verbei. Des woar dr Boahiebergang be Untergeegerschwald. Des Haus woar net grueß, ober wos do alles gebellt und geschnoatert hot. Taubn sei rimgefluegn, mr hot gedacht, mittn dinne Wald is e Zoo. Dorch den Spuk vun de Kinner sei de Boahwärterleit vun Haus rauskumme und wottn sehe, wos do nu lues is. Ne Trommersch Franz mit seiner Ida ham mier Wannerkinner mit'n Lehrer neigierig gemacht. Nu, die ham siech gefraat, aß se mol aans besucht und nuch drzu sue en Haufn Kinner. "Ach", schreit e Gung, "doroane is e klaans Greebl mit eren Kreiz. "Miezi" stieht druebn und drnebn nuch e klaaner Hiegel, do is ober kaa Kreiz drauf". Itze koam dr Franz hie und sogt: "Do muss iech eich wos drziehln, ihr Kinner". Unner Lehrer sogt: "Ja, do horch'n mr zu, mier setzn uns do gleich nei's Gros und machen eweng Frühstück. Dr Franz fängt oa: "Ihr sett doch, doroane gieht de Boah verbei und dodorch ham mr scho mannichs Stück Viehlich eigebüßt. Und doroane liegt unner Katz, Mizi hot se gehaaßn, die hot dr Zug ieberfoahrn. Unnere Enkele drubn Wer ham se begrobn und e Kreizl hiegesteckt mit ihrn Noame. Und unter den annern Hiegel, do liegt unner Hund, dr Prinz. Den ho iech erscht vur e poar Togne begrobn, der woar arg gut und trei". "Warn doch emol vun Bargn Leit kumme und wottn Schwamme suchn. Se hettn en klann Gung miet, Rolf hot'r gehaaßn. Dr Teifel will's, der Klaa verlaaft siech. Sei Voater kunnt schreie und pfeifn, wie'r wott, er woar net aufzefinne. Draun Geegerschwald is drwegn hie e do e weng sumpfig und des hot ne Voater Angst gemacht. Do is'r ze uns kumme, wall'r siech kann Rot mehr gewesst hot und gemaant, mier müssn Leit roaschaffn, mei Gung hot siech verloffn. Unner Hund, dr Prinz, woar vur seiner Hütt gelegn und hot siech gesunnt. Is mr doch eigefalln", sue drziehlt dr Franz watter, "aß iech jedn Tog de Boahglaaser oagiehe mit'n Hund, wall des mei Aufgob woar. Ober wehe, wenn uns mol e Hos ober e Reh nei dr Quer koam, hett iech ze toa, aß dr Hund be mier gebliebn is. Do ho iech san Voater gefregt, ob'r wos hot, wos sei Gung oa hett. Naa, naa, maant'r klaalaut, höchstens doroane den Schoal, den'r ro hot, wall's e weng warm wurn is. Sue hot'r ne Prinz geschriern und hot ne droa den Schoal schnupfern loon und gesogt: Prinz, such! Mei Prinz hot de Fährt aufgenumme, mier kunn'tn goar net sue hortig miet fortkumme, iech musst ne bremsn. Es goang egoal watter bis af Obergeegerschwald zu. Uebn ben Martin san Haus hot'r ze Belln oagefange. Woar doch dr Gung bis zen Martin kumme, und der hot ne gefunne. Dr Martin wott ne gerod no af Bargn schaffn. Do warn mr ober alle frueh. Jedn Tog, sue hot dr Franz watter drziehlt, gieh iech mit'n Prinz de Boahschiene entlang und sue woarsch vur 8 Togne aah. Itze kimmt dr 10er-Zug gefoahrn. Wie's zugange is, waß iech net, af aamol tut's hinter mier en Quieker, iech dreh miech im und siehe man Prinz dotte liegn. Dr Zug hett ne drwischt. Er koam nimmer ze siech, iech ho ne af de Seit gelegt und bie ham, is Weegl ze huln und ne hamzefoahrn. Wu iech hie dere Stell wieder kumme bie, log mei Prinz nimmer dotte. Iech ho scho weng gesucht, ober ze finne woar nix. Drei Tog drnooch log frieh dr Prinz vur seiner Hütt und sooch erbärmlich aus. Mier ham ne rannefiert und ze trinken gebn und ne eweng Fressn hiegestellt. Nei dr Stumm ham mr ne geschafft und nei Deckn gewickelt. Ober es hot alles nix geholfn, unner Prinz woar ne nächstn Frieh tuet. Sue ho iech ne nebn dr Mizi begrobn. Ober meine Enkele wenn kumme", maant dr Franz, "und dr Prinz is nimmer do!" - - Uns Kinnern woar fei es Wasser drin de Augn gestandn und dr Lehrer sogt: "Kummt, Kinner, itze müssn mr watter". Mier ham uns ben Trummersch Franz bedankt und unner Wandering ging wieder lues. Blueß allezamm warn mr e weng ergriffn vun dem, wos uns dr Franz drziehlt hatt. Sue is aah unterwegs nimmer hie-e-her gezäckelt wurn. Unner Wannertog is gut nausgange, blueß es End vum Lied woar, aß mr din dr Schul dodrieber en Aufsatz schreibn musstn. Iech ho sue ähnlich, wie in dere Geschichte do, aah geschriebn. Wu iech itze die Geschichte aufgeschriebn ho, dacht iech, den Weg,, den mier sellemol vur ugefähr 65 Goarhn gemacht ham, den machste nuch emol. Ober do hot siech drwalle sue viel verändert. Dr Bargner Bahhuef is ball nimmer oazeguckn, dr Schwarzenberger is weggerissn, afn Boahdamm gibt's kaane Schiene mehr und es Boahwärterhaisl vum Trummersch Franz und seiner Ida is aah nimmer, blueß e freier Fleck is nuch und e poar Staa liegn dort. Do koam mr sogn: Alles is vergänglich! Noch einige Anmerkungen: Nach Rücksprache mit Marita Krmasch, Tochter des verstorbenen Mundartautors Walter Reinhold, die mit der Veröffentlichung im Internet einverstanden ist, soll auf folgendes hingewiesen werden: Ein großer Teil der selbst erlebten Geschichten sind in zwei von ihm herausgegebenen Mundartbüchern enthalten und zwar "Werdaer Zuckermännle und e weng mehr" und "Unter'm Vuegelbeerbaam". Das erste Heft ist vergriffen, von dem zweiten Heft " Unter'm Vuegelbeerbaam" sind noch Exemplare vorhanden und über seine Frau bzw. Tochter erhältlich. Bei Interesse nutzen Sie bitte unser Kontaktformular. Wir werden Ihre Bestellung weiterleiten. |